أنا كنت بحب واحد أعرفه من زمان؛ بس ارتبطنا
تقريباً من 6 شهور، وحبيته أوي، وكان مهتم بيّ جداً في الأول، زي أي اتنين
مرتبطين، وأهلي عارفين؛ بس هو دايماً بيشتكي إني مش باتغير وباعمل تصرفات
بتضايقه مني وكده، وسامحني كذا مرة.
لحد من شهر صرحت له إني كنت مرتبطة بحدّ
قبله، وكان لازم أقول له، وهو فعلاً احترم صراحتي وقتها؛ ولكنه بعد فترة
قال لي إنه مش هيقدر يكمّل وإننا لازم نفترق، والسبب إني مش قادرة أكون زي
ما هو عاوز؛ وخاصة إني كدبت عليه من البداية، وما قلتش إني كنت مرتبطة،
وإني كدبت وخبيت، وإني أكيد مخبّيّة عليه حاجات كتير؛ فحاولت إنه يسامحني؛
بس ما فيش فايدة.
ولكن إداني فرصة إنه يفكر وإنه يحاول يجرّب إذا قدر يصفى لي ويرجع ولا لأ. وجاني بعدها بأسبوع وكلّمته وقال لي إن خلاص ما ينفعش.
ولكن عرفت إنه اطمّن عليّ مرتين من أصحابي،
وإنه عاوزني أخرج من اللي أنا فيه، ولما سألته ليه بيعمل كده؟ قال لي
العِشرة والأيام ما تهونش، وإنه عايز يشوفني أحسن واحدة في الدنيا، وإن ما
حدش عارف، وحكى لي قصة صديقه اللي رجع بعد سنتين لحبيبته.
وأنا مش عارفة أعمل إيه؟ أنا بحبه ومش قادرة
أعيش من غيره، ومش عارفة هو بيحبيني ولا عمره ما حبني؟ ولا كان.. ودلوقتي
لا؟ أنا مش عارفة أنساه ولا عارفة أعيش.. ولا عارفة هو هيرجع ولا لأ..
وعاوزة حل.. بليز تردّوا عليّ.. أتصرف إزاي؟ مستنية الرد.