من طرف جانا العيد.. أهو جانا العيد!
النهارده العيد!
وبكره وبعده وبعده كمان!
واضح طبعا وعارفين إن إنتم عارفين!
كل سنة وإنتم طيبين
ده أولا
ثانيا
إحنا -بمناسبة العيد- أخدنا إجازة
أيوه إجازة
يعني لحمة وفتة ولمة ومراجيح وفسح وسينما وكده يعني!
وعشان كده
أول كلمة المرة دي بتاعتكم
أيوه بتاعتكم إنتم
دي عيديتنا ليكم السنة دي
ابسِط يا عم!
ما تشوفهاش حاجة بسيطة
ده إحنا بنقدم لكم هدية كلمة الافتتاحية في الموقع
بس برضه مش هنسيبكم
مش عشان عيد تقولوا هيييييييييييييييييه سابوا لنا الموقع!
إحنا برضه موجودين معاكم
وهنتكلم عن العيد برضه
بس اللي هيتكلم هو إنتم
هي دي عيديتكم لينا
وهي دي فرحة العيد
إن كلنا نكون مع بعض
والمطلوب إيه؟
ده سؤال وجيه
وإجابته بسيطة جدا
كل ما هو مطلوب منك..
إنك تحكي لنا عن كل ذكرياتك عن عيد الأضحى
أكتر موقف دمه خفيف تعرضت له يوم العيد..
أكتر موقف صعب وحرج ودمه مش خفيف!
أكتر موقف أثر فيك وخلاك تحس بمعنى العيد فعلا
توصف لنا إحساسك الصبح وإنت رايح تصلى العيد
في أي المساجد بتصلي.. وليه؟
قضيت العيد قبل كده بره مصر.. طب وكان طعمه إيه؟
بتسافر في العيد؟ طب بتروح فين وليه؟
مين اللي بتحب يكون معاك في العيد ومين -بعيد بعيد- ما بتحبش؟
جربت تقضي العيد قبل كده لوحدك... طب إزاي؟
فاكر مراجيح العيد؟ لسه بتركبها صحيح؟
طب والخروف.. بتدبح وكده ولا بتشارك ولا ولا؟
كل حاجة.. كل حاجة..
يعني سيب نفسك خالص كده
وغمض عينيك
واحك واكتب كل حاجة
جربتها أو حسيتها أو شفتها أو عملتها في العيد
ما تكتب يا عم خلينا كلنا نعيّد مع بعض
وكل سنة وإنتم "معيدين"
